Puji & Besai Mulia ka Tuhan laban ulih pemanah pemesai kuasa Iya, Ministri Iban Ampang @ ACA udah dibuka enggau naka pengerami. Tu meh siti agi tanda Ministri Iban deka majak ngerembai kelebih agi ba area Kuala Lumpur & Selangor lalu pia mega di Semenanjung.
Angkat. Mansang, semua kitai ti bejako Iban ngempung lalu nudok ka kitai semua ngagai tangga ti tinggi dalam pengarap lalu dipandang ka kitai dalam pengidup kitai. Ukai semina aja di Gerija seminggu sekali tang 24 jam, 7 hari seminggu & 365/6 setahun.
Kitai mesti ingat ka Jako Rasul Paul dalam 2 Korint 8:7, "Kita kaya dalam semua utai ti dikemisi kita: Dalam pengarap, jako,enggau penemu, dalam pengingin kita ti deka nulong enggau dalam pengerindu kita ka kami. Nya alai kami mega minta kita enda kakang dalam pengasih tu".
Aram sama kitai enda kira dini alai sama ngangkat ka diri enggau bala kitai, dalam pengarap ka dalam agi, dalam jako ti landik agi, dalam penemu ti luar biasa, ngayan ka pengerindu kitai lalu bisi pengasih ka pendiau bala ti apin ngelala Tuhan.
Semua kitai mesti selalu ingat tuju kitai ka dunya tu endang deka ngemesai ka nama Tuhan lalu mai orang ngelala Iya mega. Lalu pesan Tuhan Jesus di dalam John 3:3, "Enggau bendar aku madah ka nuan: nadai siko orang ulih meda perintah Tuhan enti enda di ada ka baru". Tu pesan Tuhan ka kitai semua.
Angkat. Mansang
Ministri Iban Ampang
